کوہ گراں سے کم نہیں یہ پیرہن اتار

کوہ گراں سے کم نہیں یہ پیرہن اتار

میں کہہ رہا ہوں روح سے اب تو بدن اتار

تجھ پر زمین جیتنے کی دھن سوار ہے

سو تجھ پہ لازمی ہے کہ پہلے گگن اتار

یہ کاروبار زیست تو چلتا رہے گا دوست

آ میکدے میں چل ذرا تھوڑی تھکن اتار

کب سے ہوں تیری دید کی حسرت میں ریگ زار

صحرا میں اب کی بار تو کوئی چمن اتار

اول ہے شرط عشق میں خود کو نثار کر

تو پار چاہتا ہے تو پھر جان و تن اتار

کچھ اس طرح سے توڑ کہ پتھر نہ رہ سکوں

تیشہ مرے وجود پہ اے کوہکن اتار

کچھ تو دکھے کرنؔ کوئی شاعر کہے تجھے

تھوڑا بہت تو لہجے میں طرز سخن اتار