koi achchha lage kitna hi bharosa na karo

koī achchhā lage kitnā hī bharosa na karo

har kisī ko kabhī apnī tarah samjhā na karo

jis meñ tūfān bhañvar mauj na gahrā.ī ho

aise paanī meñ kabhī bhuul ke utrā na karo

chand sapne hī to TuuTe haiñ abhī saañs nahīñ

is tarah apnī tamannāoñ ko mailā na karo

band kamre se nikal aao ki duniyā hai baḌī

haath par haath dhare baiTh ke sochā na karo

ham ne maanā ki bahut TuuT chuke ho phir bhī

chal paḌe ho to kahīñ raah meñ Thahrā na karo

sar uThātī huī maujoñ se havāoñ ne kahā

vaqt ke saath chalo vaqt se uljhā na karo

na jalā paañv na.e diip koī baat nahīñ

kam se kam un ko jo jalte haiñ bujhāyā na karo

chāhe kitne hī ghane kyuuñ na hoñ saa.e us ke

niim ke peḌ se aamoñ kī tamannā na karo

un zamīnoñ ko mahakne do abhī peḌoñ se

vaqt se pahle unheñ kaaT ke sahrā na karo

apnī pahchān agar tum ko hai karnī qaa.em

sab kī āvāz meñ āvāz milāyā na karo

Dañk chāhe koī maare koī chāhe Das le

zahr se zahr ko 'āsif' kabhī maarā na karo

koi achchha lage kitna hi bharosa na karo

har kisi ko kabhi apni tarah samjha na karo

jis mein tufan bhanwar mauj na gahrai ho

aise pani mein kabhi bhul ke utra na karo

chand sapne hi to TuTe hain abhi sans nahin

is tarah apni tamannaon ko maila na karo

band kamre se nikal aao ki duniya hai baDi

hath par hath dhare baiTh ke socha na karo

hum ne mana ki bahut TuT chuke ho phir bhi

chal paDe ho to kahin rah mein Thahra na karo

sar uThati hui maujon se hawaon ne kaha

waqt ke sath chalo waqt se uljha na karo

na jala panw nae dip koi baat nahin

kam se kam un ko jo jalte hain bujhaya na karo

chahe kitne hi ghane kyun na hon sae us ke

nim ke peD se aamon ki tamanna na karo

un zaminon ko mahakne do abhi peDon se

waqt se pahle unhen kaT ke sahra na karo

apni pahchan agar tum ko hai karni qaem

sab ki aawaz mein aawaz milaya na karo

Dank chahe koi mare koi chahe Das le

zahr se zahr ko 'asif' kabhi mara na karo