کوئی باہر سے کوئی اندر اندر ٹوٹ جاتا ہے

کوئی باہر سے کوئی اندر اندر ٹوٹ جاتا ہے

جب انساں آتا ہے گردش کی زد پر ٹوٹ جاتا ہے

اگر میں مٹ گیا حالات سے تو اس میں حیرت کیا

مسلسل چوٹ پڑتی ہے تو پتھر ٹوٹ جاتا ہے

سحر کے وقت جب سورج نکلنا چاہتا ہے تو

فلک کی گود میں تاروں کا لشکر ٹوٹ جاتا ہے

نہیں ہے بد نصیبی یہ تو اس کو کیا کہا جائے

بھلا لگتا ہے جو آنکھوں کو منظر ٹوٹ جاتا ہے

خوشی کا دور آئے گا لیے ہیں خواب آنکھوں میں

مگر کیا کیجئے یہ خواب اکثر ٹوٹ جاتا ہے