koi batao ki aaKHir kis imtihan mein hai

koī batāo ki āḳhir kis imtihān meñ hai

hamārī ruuh safar meñ hai aur makān meñ hai

maiñ sochtā huuñ magar kyā mujhe nahīñ mā'lūm

maiñ dekhtā huuñ magar dhyān kis ke dhyān meñ hai

jahāñ maiñ huuñ vahīñ us ko bhī honā chāhiye phir

mujhe vo kyoñ nahīñ miltā vo kis jahān meñ hai

daraḳht chup haiñ to phir shor kar rahā hai kaun

havā bhī band hai jangal bhī gahre dhyān meñ hai

vo apnī khoj meñ nikle to tujh ko mil hī jaa.e

vo terī khoj meñ hai shahr-e-bad-gumān meñ hai

usī kā tarjuma bhar merī shā'irī 'sānī'

vo ek lafz jo mub.ham sā mere kaan meñ hai

koi batao ki aaKHir kis imtihan mein hai

hamari ruh safar mein hai aur makan mein hai

main sochta hun magar kya mujhe nahin ma'lum

main dekhta hun magar dhyan kis ke dhyan mein hai

jahan main hun wahin us ko bhi hona chahiye phir

mujhe wo kyon nahin milta wo kis jahan mein hai

daraKHt chup hain to phir shor kar raha hai kaun

hawa bhi band hai jangal bhi gahre dhyan mein hai

wo apni khoj mein nikle to tujh ko mil hi jae

wo teri khoj mein hai shahr-e-bad-guman mein hai

usi ka tarjuma bhar meri sha'iri 'sani'

wo ek lafz jo mubham sa mere kan mein hai