کوئی بتاؤ کہ آخر کس امتحان میں ہے

کوئی بتاؤ کہ آخر کس امتحان میں ہے

ہماری روح سفر میں ہے اور مکان میں ہے

میں سوچتا ہوں مگر کیا مجھے نہیں معلوم

میں دیکھتا ہوں مگر دھیان کس کے دھیان میں ہے

جہاں میں ہوں وہیں اس کو بھی ہونا چاہیے پھر

مجھے وہ کیوں نہیں ملتا وہ کس جہان میں ہے

درخت چپ ہیں تو پھر شور کر رہا ہے کون

ہوا بھی بند ہے جنگل بھی گہرے دھیان میں ہے

وہ اپنی کھوج میں نکلے تو تجھ کو مل ہی جائے

وہ تیری کھوج میں ہے شہر بد گمان میں ہے

اسی کا ترجمہ بھر میری شاعری ثانیؔ

وہ ایک لفظ جو مبہم سا میرے کان میں ہے