koi bhi zor KHaridar par nahin chalta

koī bhī zor ḳharīdār par nahīñ chaltā

ki kārobār to aḳhbār par nahīñ chaltā

ham aap apnā garebān chaak karte haiñ

hamārā bas hī to sarkār par nahīñ chaltā

kuchh aur chāhiye taskīn-e-jism-o-jāñ ke liye

hamārā kaam to dīdār par nahīñ chaltā

maiñ jāntā huuñ mujhe kis kā saath denā hai

maiñ billī ban ke to dīvār par nahīñ chaltā

usuul jitne haiñ laagū hamīñ pe hote haiñ

aur ek yār-e-tarah-dār par nahīñ chaltā

unheñ lihāz nahīñ hai jo merī marzī kā

to maiñ bhī marzi-e-aġhyār par nahīñ chaltā

na jaane kab tumheñ auqāt apnī dikhlā de

ab itnā zulm bhī nādār par nahīñ chaltā

mire suḳhan kā bahāna haiñ qāfiya o radīf

maiñ sher kahtā huuñ kuchh taar par nahīñ chaltā

ra.uuf 'ḳhair' pahuñchtā vahīñ hai hir-phir kar

ki iḳhtiyār dil-e-zār par nahīñ chaltā

koi bhi zor KHaridar par nahin chalta

ki karobar to aKHbar par nahin chalta

hum aap apna gareban chaak karte hain

hamara bas hi to sarkar par nahin chalta

kuchh aur chahiye taskin-e-jism-o-jaan ke liye

hamara kaam to didar par nahin chalta

main jaanta hun mujhe kis ka sath dena hai

main billi ban ke to diwar par nahin chalta

usul jitne hain lagu hamin pe hote hain

aur ek yar-e-tarah-dar par nahin chalta

unhen lihaz nahin hai jo meri marzi ka

to main bhi marzi-e-aghyar par nahin chalta

na jaane kab tumhein auqat apni dikhla de

ab itna zulm bhi nadar par nahin chalta

mere suKHan ka bahana hain qafiya o radif

main sher kahta hun kuchh tar par nahin chalta

rauf 'KHair' pahunchta wahin hai hir-phir kar

ki iKHtiyar dil-e-zar par nahin chalta