koi dekhe to zara kaisi saza deta hai

koī dekhe to zarā kaisī sazā detā hai

merā dushman mujhe jiine kī duā detā hai

hākim-e-vaqt bhī hālāt se aajiz aa kar

vaqt ke sāmne sar apnā jhukā detā hai

kyā huā tū ne jo ġhurbat meñ chhuḌāyā dāman

aise hālāt meñ har koī daġhā detā hai

lutf aatā nahīñ ho kar bhī shikam-ser tumheñ

ham ġharīboñ ko to faaqa bhī maza detā hai

duur ākāsh meñ uḌtā huā sūkhā pattā

aane vaale kisī tūfāñ kā patā detā hai

haath phailā.ūñ kisī ġhair ke aage kyūñ-kar

mujh ko har chiiz binā māñge ḳhudā detā hai

jis kī āvāz ko sun kar maiñ taḌap jaatā huuñ

mere andar se mujhe kaun sadā detā hai

koī manzil pe nahīñ chhoḌtā le jā ke 'rafīq'

har koī duur se bas raah dikhā detā hai

koi dekhe to zara kaisi saza deta hai

mera dushman mujhe jine ki dua deta hai

hakim-e-waqt bhi haalat se aajiz aa kar

waqt ke samne sar apna jhuka deta hai

kya hua tu ne jo ghurbat mein chhuDaya daman

aise haalat mein har koi dagha deta hai

lutf aata nahin ho kar bhi shikam-ser tumhein

hum gharibon ko to faqa bhi maza deta hai

dur aakash mein uDta hua sukha patta

aane wale kisi tufan ka pata deta hai

hath phailaun kisi ghair ke aage kyun-kar

mujh ko har chiz bina mange KHuda deta hai

jis ki aawaz ko sun kar main taDap jata hun

mere andar se mujhe kaun sada deta hai

koi manzil pe nahin chhoDta le ja ke 'rafiq'

har koi dur se bas rah dikha deta hai