کوئی دن صبر کے پھر مندمل ہو جائے گا غم

کوئی دن صبر کے پھر مندمل ہو جائے گا غم

نشاں رہ جائے گا اور مستقل ہو جائے گا غم

کسی لمبے سفر میں شام ہو جائے گی غم کو

کہیں اک راہ تکتے مضمحل ہو جائے گا غم

کسے معلوم تھا کام آئے گی سینہ خراشی

اور اس سینے میں آخر کار دل ہو جائے گا غم

افق پر ڈوبتے دکھ سے ستارے کہہ رہے ہیں

چمک اٹھیں گے ہم جب منتقل ہو جائے گا غم

کسی فرصت کی شب دل پر اداسی چھائے گی اور

کسی مصروف دن پر مشتمل ہو جائے گا غم

تمہیں حسرت سے ہم دیکھیں گے اور تم مسکرانا

اس اک لمحے میں جب آ کر مخل ہو جائے گا غم

چلے گی یاد جب تنہائی میں روزن کھلے گا

مزہ آ جائے گا جب منفعل ہو جائے گا غم

کہاں خلوت میسر آئے گی کم فرصتوں کو

جدا ہوگی خوشی تو متصل ہو جائے گا غم

خوشی اک ڈھونڈنے نکلے گا غم لیکن اچانک

بہم ہو کر کسی غم سے خجل ہو جائے گا غم