koi KHwab subh-e-dawam ka shab-e-be-sahar ka nasib tha

koī ḳhvāb sub.h-e-davām kā shab-e-be-sahar kā nasīb thā

tū sarāb-e-dasht-e-hayāt thā mirī chashm-e-tar kā nasīb thā

vo jo barg-e-mausam-e-yās the mire rāstoñ kā libās the

jo kamāl-e-fasl-e-bahār thā tirī rah-guzar kā nasīb thā

vo samar jo zīnat-e-shāḳh the vo to aa ga.e kisī haath meñ

rahā sang-e-dast samar-talab to vahī shajar kā nasīb thā

tirī chāhatoñ ke sahāb to kisī ḳhush-nasīb pe chhā ga.e

tirī justujū kā sarāb hī mirī 'umr-bhar kā nasīb thā

vo gumān-e-sāz-e-sadā-e-pā mire dil meñ naġhma-navā sahī

tirī āhaToñ kā gudāz to kisī aur ghar kā nasīb thā

koi KHwab subh-e-dawam ka shab-e-be-sahar ka nasib tha

tu sarab-e-dasht-e-hayat tha meri chashm-e-tar ka nasib tha

wo jo barg-e-mausam-e-yas the mere raston ka libas the

jo kamal-e-fasl-e-bahaar tha teri rah-guzar ka nasib tha

wo samar jo zinat-e-shaKH the wo to aa gae kisi hath mein

raha sang-e-dast samar-talab to wahi shajar ka nasib tha

teri chahaton ke sahab to kisi KHush-nasib pe chha gae

teri justuju ka sarab hi meri 'umr-bhar ka nasib tha

wo guman-e-saz-e-sada-e-pa mere dil mein naghma-nawa sahi

teri aahaTon ka gudaz to kisi aur ghar ka nasib tha