کوئی خواب صبح دوام کا شب بے سحر کا نصیب تھا

کوئی خواب صبح دوام کا شب بے سحر کا نصیب تھا

تو سراب دشت حیات تھا مری چشم تر کا نصیب تھا

وہ جو برگ موسم یاس تھے مرے راستوں کا لباس تھے

جو کمال فصل بہار تھا تری رہگزر کا نصیب تھا

وہ ثمر جو زینت شاخ تھے وہ تو آ گئے کسی ہاتھ میں

رہا سنگ دست ثمر طلب تو وہی شجر کا نصیب تھا

تری چاہتوں کے سحاب تو کسی خوش نصیب پہ چھا گئے

تری جستجو کا سراب ہی مری عمر بھر کا نصیب تھا

وہ گمان ساز صدائے پا مرے دل میں نغمہ نوا سہی

تری آہٹوں کا گداز تو کسی اور گھر کا نصیب تھا