koi mahbub sitamgar bhi to ho sakta hai

koī mahbūb sitamgar bhī to ho saktā hai

phuul ke haath meñ ḳhanjar bhī to ho saktā hai

ek muddat se jise log ḳhudā kahte haiñ

chhū ke dekho ki vo patthar bhī to ho saktā hai

mujh ko āvārgī-e-ishq kā ilzām na do

koī is shahr meñ be-ghar bhī to ho saktā hai

kaise mumkin ki use jaañ ke barābar samjhūñ

vo mirī jaan se baḌh kar bhī to ho saktā hai

sirf sāvan to nahīñ aag lagāne vaalā

june kī tarah december bhī to ho saktā hai

chāk-dāman se mire mujh ko burā mat samjho

koī yūsuf sā payambar bhī to ho saktā hai

sirf chehroñ pe latāfat koī mauqūf nahīñ

chāñd jaisā koī patthar bhī to ho saktā hai

tum sar-e-rāh mile the to kabhī phir se milo

hādisa shahr meñ aksar bhī to ho saktā hai

saarā ilzām-e-jafā us pe kahāñ tak rakhkhūñ

ye mirā apnā muqaddar bhī to ho saktā hai

kyā zarūrī hai ki ham sar ko jhukā.eñ 'zaḳhmī'

ek sajda mire andar bhī to ho saktā hai

koi mahbub sitamgar bhi to ho sakta hai

phul ke hath mein KHanjar bhi to ho sakta hai

ek muddat se jise log KHuda kahte hain

chhu ke dekho ki wo patthar bhi to ho sakta hai

mujh ko aawargi-e-ishq ka ilzam na do

koi is shahr mein be-ghar bhi to ho sakta hai

kaise mumkin ki use jaan ke barabar samjhun

wo meri jaan se baDh kar bhi to ho sakta hai

sirf sawan to nahin aag lagane wala

june ki tarah december bhi to ho sakta hai

chaak-daman se mere mujh ko bura mat samjho

koi yusuf sa payambar bhi to ho sakta hai

sirf chehron pe latafat koi mauquf nahin

chand jaisa koi patthar bhi to ho sakta hai

tum sar-e-rah mile the to kabhi phir se milo

hadisa shahr mein aksar bhi to ho sakta hai

sara ilzam-e-jafa us pe kahan tak rakhkhun

ye mera apna muqaddar bhi to ho sakta hai

kya zaruri hai ki hum sar ko jhukaen 'zaKHmi'

ek sajda mere andar bhi to ho sakta hai