koi mujh mein ye aksar puchhta hai

koī mujh meñ ye aksar pūchhtā hai

mujhe āḳhir kahāñ rakkhā huā hai

hai saarā khel in āñkhoñ ke ghar meñ

haqīqat meñ jo bāhar dikh rahā hai

khulī hai ek khiḌkī sī badan meñ

vahīñ se ye nazāra ho rahā hai

barahna peḌ bhī poshāk meñ haiñ

tumheñ dikhtā nahīñ har sū havā hai

rukāvaT rāste meñ kuchh nahīñ hai

yuuñ hī kuchh der manzar dekhnā hai

na hī dariyā samundar aabjū se

hameñ to apne jal se vāsta hai

isī Thahrāv meñ ye chal chalāo

agar dekho to rasta mil gayā hai

ham apnī hijratoñ meñ mar rahe haiñ

vo apnī qaid meñ kaise jiyā hai

ye duniyā hai ise paanā nahīñ hai

ise bas dekhnā hai dekhnā hai

kisī 'ādil kisī ‘masto’ ke dil meñ

chale aao yahī qābil jagah hai

koi mujh mein ye aksar puchhta hai

mujhe aaKHir kahan rakkha hua hai

hai sara khel in aankhon ke ghar mein

haqiqat mein jo bahar dikh raha hai

khuli hai ek khiDki si badan mein

wahin se ye nazara ho raha hai

barahna peD bhi poshak mein hain

tumhein dikhta nahin har su hawa hai

rukawaT raste mein kuchh nahin hai

yun hi kuchh der manzar dekhna hai

na hi dariya samundar aabju se

hamein to apne jal se wasta hai

isi Thahraw mein ye chal chalao

agar dekho to rasta mil gaya hai

hum apni hijraton mein mar rahe hain

wo apni qaid mein kaise jiya hai

ye duniya hai ise pana nahin hai

ise bas dekhna hai dekhna hai

kisi 'adil kisi ‘masto’ ke dil mein

chale aao yahi qabil jagah hai