کوئی نہ ہم سفر نہ کوئی رہنما ملا

کوئی نہ ہم سفر نہ کوئی رہنما ملا

جس سمت بھی گیا میں فقط نقش پا ملا

اسرار اپنی ذات کے مجھ پر کھلے تمام

جب آپ ہی میں اپنے مقابل کھڑا ملا

پوچھا جو شمع سے تو اسے چپ سی لگ گئی

بدلے میں روشنی کے تجھے کیا صلہ ملا

دیکھا جو دل میں جھانک کے اس کے نشاں ملے

اک آئنے میں اور بھی اک آئنہ ملا

وہ مجھ سے مختلف تھا میں اس سے تھا مختلف

پھر اس کے دل سے کیسے مرا دل یہ جا ملا

کچھ خواہشیں تھیں شوق تھے تھوڑے سے خواب تھے

کیا چاہیے تھا ہم کو مگر کیا سے کیا ملا

شاید یہ زندگی کے ہی صدمات تھے کہ جو

ہر شخص اپنے آپ سے بے حد خفا ملا