koi surat KHat-e-idrak par aai nahin hai

koī sūrat ḳhat-e-idrāk par aa.ī nahīñ hai

abhī tak apnī miTTī chaak par aa.ī nahīñ hai

jo mauj-e-ḳhūñ humaktī hai azal se qā’r-e-dil meñ

abhī tak dīda-e-namnāk par aa.ī nahīñ hai

masāfat meñ hamāre ham-safar Thahre bagūle

zarā sī gard bhī poshāk par aa.ī nahīñ hai

use qarnoñ zamāna oḌh kar phirtā rahā hai

shikan bhī chādar-e-aflāk par aa.ī nahīñ hai

samundar karb kā yuuñ to bahut biphrā huā thā

thakan lekin abhī pairāk par aa.ī nahīñ hai

gumān-e-hast kyā hotā ki jab ham ko yaqīñ thā

ki apnī ḳhaak ab tak ḳhaak par aa.ī nahīñ hai

dar-o-dīvār par vīrāniyāñ qaa.em haiñ 'at.har'

numū kī rau vujūd-e-tāk par aa.ī nahīñ hai

koi surat KHat-e-idrak par aai nahin hai

abhi tak apni miTTi chaak par aai nahin hai

jo mauj-e-KHun humakti hai azal se qa’r-e-dil mein

abhi tak dida-e-namnak par aai nahin hai

masafat mein hamare ham-safar Thahre bagule

zara si gard bhi poshak par aai nahin hai

use qarnon zamana oDh kar phirta raha hai

shikan bhi chadar-e-aflak par aai nahin hai

samundar karb ka yun to bahut biphra hua tha

thakan lekin abhi pairak par aai nahin hai

guman-e-hast kya hota ki jab hum ko yaqin tha

ki apni KHak ab tak KHak par aai nahin hai

dar-o-diwar par viraniyan qaem hain 'athar'

numu ki rau wujud-e-tak par aai nahin hai