کوئی صورت کوئی تدبیر نکالی جائے

کوئی صورت کوئی تدبیر نکالی جائے

آبرو عشق و محبت کی بچا لی جائے

کون دیتا ہے وفاؤں کا وفاؤں سے جواب

اب تو بہتر ہے کہ یہ رسم اٹھا لی جائے

فی‌ زمانہ ہے یہی مصلحت عقل و شعور

دل میں خواہش کوئی ابھرے تو دبا لی جائے

سامنے بچوں کے دہراؤ نہ پچھلے جھگڑے

ننھے ذہنوں میں یہ بنیاد نہ ڈالی جائے

مشورہ میرا بس اتنا ہے نئی نسلوں کو

اپنے اجداد کی پگڑی نہ اچھالی جائے

میرے اللہ مجھے اتنا تونگر کر دے

در سے میرے کبھی خالی نہ سوالی جائے

کوئی ملتا ہی نہیں واقف آداب جنوں

اب تو بستی ہی الگ اپنی بسا لی جائے

اس طرف وہ تو ادھر ہم ہیں پریشاں ببیاکؔ

خواہش دید کسی طور نہ ٹالی جائے