koi talash adhuri si rah gai mujh mein

koī talāsh adhūrī sī rah ga.ī mujh meñ

khaTak rahī hai kisī baat kī kamī mujh meñ

kahāñ hai sahl kisī lafz kā ravāñ honā

Thahar ga.ī hai baḌī saḳht ḳhāmushī mujh meñ

safar kī rasm nibhāne ko chal rahā huuñ maiñ

vagarna tāb-e-safar ab kahāñ bachī mujh meñ

ḳhayāl-o-ḳhvāb pe kaa.ī sī jam ga.ī āḳhir

azal se Thahrī huī hai koī nadī mujh meñ

'ajīb rang rahā dil ke kār-ḳhāne kā

na raushnī hī salāmat na tīrgī mujh meñ

vo āsmāñ huuñ ki mātam nasīb hai jiskā

sitāre roz hī karte haiñ ḳhud-kushī mujh meñ

vo ek baar mire sāhiloñ pe utrā thā

phir us ke baa'd faqat ret rah ga.ī mujh meñ

koi talash adhuri si rah gai mujh mein

khaTak rahi hai kisi baat ki kami mujh mein

kahan hai sahl kisi lafz ka rawan hona

Thahar gai hai baDi saKHt KHamushi mujh mein

safar ki rasm nibhane ko chal raha hun main

wagarna tab-e-safar ab kahan bachi mujh mein

KHayal-o-KHwab pe kai si jam gai aaKHir

azal se Thahri hui hai koi nadi mujh mein

'ajib rang raha dil ke kar-KHane ka

na raushni hi salamat na tirgi mujh mein

wo aasman hun ki matam nasib hai jiska

sitare roz hi karte hain KHud-kushi mujh mein

wo ek bar mere sahilon pe utra tha

phir us ke ba'd faqat ret rah gai mujh mein