koi to rah sujha dur tak andhera hai

koī to raah sujhā duur tak añdherā hai

kahāñ hai mere ḳhudā duur tak añdherā hai

mirā ḳhayāl thā kuchh aage raushnī ho gī

maiñ jāntā nahīñ thā duur tak añdherā hai

kisī kī khoj meñ niklā huuñ mehr-o-māh liye

hai iltimās-e-duā duur tak añdherā hai

na hogā tai ye safar sirf raushan āñkhoñ se

charāġh-e-dil bhī jalā duur tak añdherā hai

nazar ke sāmne the an-ginat sitāre magar

faqīr kahtā rahā duur tak añdherā hai

hamāre haath kī rekhā.eñ kyā batātī haiñ

hameñ batā.iye kyā duur tak añdherā hai

'aqīl' pahle to bīnā.ī kī bashārat dī

phir us ne mujh se kahā duur tak añdherā hai

koi to rah sujha dur tak andhera hai

kahan hai mere KHuda dur tak andhera hai

mera KHayal tha kuchh aage raushni ho gi

main jaanta nahin tha dur tak andhera hai

kisi ki khoj mein nikla hun mehr-o-mah liye

hai iltimas-e-dua dur tak andhera hai

na hoga tai ye safar sirf raushan aankhon se

charagh-e-dil bhi jala dur tak andhera hai

nazar ke samne the an-ginat sitare magar

faqir kahta raha dur tak andhera hai

hamare hath ki rekhaen kya batati hain

hamein bataiye kya dur tak andhera hai

'aqil' pahle to binai ki bashaarat di

phir us ne mujh se kaha dur tak andhera hai