کورے کاغذ پہ کئی نقش بنائے میں نے

کورے کاغذ پہ کئی نقش بنائے میں نے

اور پھر اک کے سوا سارے مٹائے میں نے

گل خود رو کی مہک جیسے کسی جنگل میں

ہائے وہ گیت جو تنہائی میں گائے میں نے

چمن فن میں رہیں گے جو ہمیشہ شاداب

ایسے گل بوٹے بھی چند ایک اگائے میں نے

خون انسان کا پانی کی طرح بہہ نکلا

اف تعصب کے وہ ہنگامے اٹھائے میں نے

اپنوں سے بڑھ کے مددگار و معاون جو تھے

دہر میں ایسے بھی دیکھے ہیں پرائے میں نے

ہائے کیا چیز تھی اے راہ محبت تو بھی

کانٹے جتنے تھے وہ پلکوں سے اٹھائے میں نے

حسن کے سینکڑوں رخ تم سے ابھی مخفی ہیں

حسن کے روپ ہزاروں ہی دکھائے میں نے

ایک بھی تیری نظر سے نہیں گزرا اے دوست

کتنے ایوان تخیل کے سجائے میں نے

شاعری بس میں مرے آئے تو جانوں مغمومؔ

عمر بھر اس کے بہت ناز اٹھائے میں نے