کوشش ترک ملاقات کا افسوس نہیں

کوشش ترک ملاقات کا افسوس نہیں

اب ہمیں ان کی کسی بات کا افسوس نہیں

عزم راسخ ہے تو خطرات کا افسوس نہیں

چھت سلامت ہے تو برسات کا افسوس نہیں

وقت پر اپنے ہر اک چیز بدل جاتی ہے

ہم کو بدلے ہوئے حالات کا افسوس نہیں

ہم ہیں اچھے ہمیں اچھا نہیں کہتے نہ سہی

ہم کو غیروں کے خیالات کا افسوس نہیں

کعبۂ دل کو بھی ڈھایا ہے ستم گاروں نے

صرف کچلے ہوئے جذبات کا افسوس نہیں

تو جو کہتا ہے بھلے ہی کے لئے کہتا ہے

اے خلشؔ تیری کسی بات کا افسوس نہیں