kuchh aisa hua be-sar-o-saman meri jaan

kuchh aisā huā be-sar-o-sāmān mirī jaañ

duniyā mujhe kahne lagī nādān mirī jaañ

sho.aloñ ko mayassar kahāñ shabnam kī rifāqat

ḳhud ko na karo aise bhī halkān mirī jaañ

tanhā.ī meñ ab un kā bhī dam ghuTne lagā hai

hijrat ko samajhte the jo āsān mirī jaañ

ab terī ināyat ho ki duniyā kī navāzish

dil ho to gayā vaise ye vīrān mirī jaañ

nādān hai tū aur ye siyahkār zamāna

is daur ke insān ko pahchān mirī jaañ

dil chāhtā ye hai ki tujhe duur se dekhūñ

lekin jo taqāze kā hai tūfān mirī jaañ

dekhā thā faqīroñ kī qabā meñ use kal tak

sab log jise kahte haiñ sultān mirī jaañ

kuchh aisa hua be-sar-o-saman meri jaan

duniya mujhe kahne lagi nadan meri jaan

shoalon ko mayassar kahan shabnam ki rifaqat

KHud ko na karo aise bhi halkan meri jaan

tanhai mein ab un ka bhi dam ghuTne laga hai

hijrat ko samajhte the jo aasan meri jaan

ab teri inayat ho ki duniya ki nawazish

dil ho to gaya waise ye viran meri jaan

nadan hai tu aur ye siyahkar zamana

is daur ke insan ko pahchan meri jaan

dil chahta ye hai ki tujhe dur se dekhun

lekin jo taqaze ka hai tufan meri jaan

dekha tha faqiron ki qaba mein use kal tak

sab log jise kahte hain sultan meri jaan