kuchh aise raston se ishq ka safar jae

kuchh aise rāstoñ se ishq kā safar jaa.e

tumhārā hijr bahut duur se guzar jaa.e

udāsiyoñ se bharī kachchī umr kī ye nasl

jo shā.erī na kare to dukhoñ se mar jaa.e

pachās logoñ se vo roz miltī hai aur maiñ

kisī ko dekh luuñ to us kā muñh utar jaa.e

ghaTā chhaTe to dikhe chāñd bhī sitāre bhī

jo tum haTo to kisī aur par nazar jaa.e

hazār saal meñ tayyār hone vaalā mard

us ek god meñ sar rakhte hī bikhar jaa.e

maiñ us badan se sabhī pairahan utārūñ aur

añdherā jism pe kapḌe kā kaam kar jaa.e

merī havas ko koī dūsrā mayassar ho

tumhārā husn kisī aur se sañvar jaa.e

kuchh aise raston se ishq ka safar jae

tumhaara hijr bahut dur se guzar jae

udasiyon se bhari kachchi umr ki ye nasl

jo shaeri na kare to dukhon se mar jae

pachas logon se wo roz milti hai aur main

kisi ko dekh lun to us ka munh utar jae

ghaTa chhaTe to dikhe chand bhi sitare bhi

jo tum haTo to kisi aur par nazar jae

hazar sal mein tayyar hone wala mard

us ek god mein sar rakhte hi bikhar jae

main us badan se sabhi pairahan utarun aur

andhera jism pe kapDe ka kaam kar jae

meri hawas ko koi dusra mayassar ho

tumhaara husn kisi aur se sanwar jae