kuchh ajab ye bargah-e-ishq ka dastur hai

kuchh ajab ye bārgāh-e-ishq kā dastūr hai

jitnā jo muḳhtār hai utnā hī vo majbūr hai

maut par qudrat hai jiine kā nahīñ maqdūr hai

tū hī dard-e-dil batā ab kyā tujhe manzūr hai

ho ke muḳhtār iḳhtiyār-e-ḳhair-o-shar se duur hai

itnī qudrat par bhī insāñ kis qadar majbūr hai

kitnā pur-hairat hai manzar āstān-e-yār kā

duur se nazdīk-tar nazdīk se phir duur hai

lazzat-e-zauq-e-asīrī hai asīrī kā sabab

varna chāheñ to qafas se āshiyāñ kyā duur hai

gum huā huuñ shauq-e-manzil meñ kuchh is andāz se

ye nahīñ ma.alūm manzil mujh se kitnī duur hai

vo tasavvur se na jaa.eñ jaan jaa.e yaar hai

mujh ko ye bhī be-ḳhudī-e-ishq meñ manzūr hai

ek vo haiñ jin kī tūfāñ meñ hai sāhil par nazar

Dūbne vaale ko sāhil se bhī sāhil duur hai

kis se ho 'afqar' umīd-e-chārasāzī dahr meñ

jo bhī is duniyā meñ hai majbūr hai majbūr hai

kuchh ajab ye bargah-e-ishq ka dastur hai

jitna jo muKHtar hai utna hi wo majbur hai

maut par qudrat hai jine ka nahin maqdur hai

tu hi dard-e-dil bata ab kya tujhe manzur hai

ho ke muKHtar iKHtiyar-e-KHair-o-shar se dur hai

itni qudrat par bhi insan kis qadar majbur hai

kitna pur-hairat hai manzar aastan-e-yar ka

dur se nazdik-tar nazdik se phir dur hai

lazzat-e-zauq-e-asiri hai asiri ka sabab

warna chahen to qafas se aashiyan kya dur hai

gum hua hun shauq-e-manzil mein kuchh is andaz se

ye nahin malum manzil mujh se kitni dur hai

wo tasawwur se na jaen jaan jae yar hai

mujh ko ye bhi be-KHudi-e-ishq mein manzur hai

ek wo hain jin ki tufan mein hai sahil par nazar

Dubne wale ko sahil se bhi sahil dur hai

kis se ho 'afqar' umid-e-chaarasazi dahr mein

jo bhi is duniya mein hai majbur hai majbur hai