kuchh bhi meri aankhon ko sujhai nahin deta

kuchh bhī mirī āñkhoñ ko sujhā.ī nahīñ detā

jab se tujhe dekhā hai dikhā.ī nahīñ detā

is shor meñ kyā baat sunā.ī nahīñ detī

bas pyaar kā ik bol sunā.ī nahīñ detā

insān kī taqdīr badaltā hai vo insān

jo nā'ra lagātā hai duhā.ī nahīñ detā

maiñ jis kī mohabbat ke maraz meñ huuñ giraftār

hai ek masīhā jo davā.ī nahīñ detā

kyā ham bhī bhalā.ī se na pesh aa.eñ kisī se

badle meñ agar koī bhalā.ī nahīñ detā

zāhir hai 'sha'ūr' aap kī bātoñ se ki allāh

har shaḳhs ke siine ko samā.ī nahīñ detā

kuchh bhi meri aankhon ko sujhai nahin deta

jab se tujhe dekha hai dikhai nahin deta

is shor mein kya baat sunai nahin deti

bas pyar ka ek bol sunai nahin deta

insan ki taqdir badalta hai wo insan

jo na'ra lagata hai duhai nahin deta

main jis ki mohabbat ke maraz mein hun giraftar

hai ek masiha jo dawai nahin deta

kya hum bhi bhalai se na pesh aaen kisi se

badle mein agar koi bhalai nahin deta

zahir hai 'sha'ur' aap ki baaton se ki allah

har shaKHs ke sine ko samai nahin deta