کچھ بھی مری آنکھوں کو سجھائی نہیں دیتا

کچھ بھی مری آنکھوں کو سجھائی نہیں دیتا

جب سے تجھے دیکھا ہے دکھائی نہیں دیتا

اس شور میں کیا بات سنائی نہیں دیتی

بس پیار کا اک بول سنائی نہیں دیتا

انسان کی تقدیر بدلتا ہے وہ انسان

جو نعرہ لگاتا ہے دہائی نہیں دیتا

میں جس کی محبت کے مرض میں ہوں گرفتار

ہے ایک مسیحا جو دوائی نہیں دیتا

کیا ہم بھی بھلائی سے نہ پیش آئیں کسی سے

بدلے میں اگر کوئی بھلائی نہیں دیتا

ظاہر ہے شعورؔ آپ کی باتوں سے کہ اللہ

ہر شخص کے سینے کو سمائی نہیں دیتا