kuchh ghaTa di gai kuchh baDha di gai

kuchh ghaTā dī ga.ī kuchh baḌhā dī ga.ī

kyā kahānī thī aur kyā banā dī ga.ī

shahr kā shahr hai aaj ḳhanjar-ba-kaf

kyā mire sar kī qīmat lagā dī ga.ī

tiir baaqī haiñ kyā tarkashoñ meñ abhī

jo hameñ zindagī kī du'ā dī ga.ī

āshiyānoñ kī barbādiyoñ kā sabab

bijliyoñ kī sharārat batā dī ga.ī

aap to un ke halqa-bagoshoñ meñ the

aap ko kis ḳhatā kī sazā dī ga.ī

raushnī ghar meñ dāḳhil na ho is liye

har darīche kī chilman girā dī ga.ī

muñh se labbaik labbaik kahte hue

jāñ-nisār aa ga.e jab sadā dī ga.ī

ġham bhī duniyā se baḌh-chaḌh ke ham ko mile

sarfarāzī bhī sab se sivā dī ga.ī

bas isī par hai barham zamāna 'azīz'

us ko tasvīr us kī dikhā dī ga.ī

kuchh ghaTa di gai kuchh baDha di gai

kya kahani thi aur kya bana di gai

shahr ka shahr hai aaj KHanjar-ba-kaf

kya mere sar ki qimat laga di gai

tir baqi hain kya tarkashon mein abhi

jo hamein zindagi ki du'a di gai

aashiyanon ki barbaadiyon ka sabab

bijliyon ki shararat bata di gai

aap to un ke halqa-bagoshon mein the

aap ko kis KHata ki saza di gai

raushni ghar mein daKHil na ho is liye

har dariche ki chilman gira di gai

munh se labbaik labbaik kahte hue

jaan-nisar aa gae jab sada di gai

gham bhi duniya se baDh-chaDh ke hum ko mile

sarfaraazi bhi sab se siwa di gai

bas isi par hai barham zamana 'aziz'

us ko taswir us ki dikha di gai