کچھ اس ادا سے نسیم بہار جھوم کے چل

کچھ اس ادا سے نسیم بہار جھوم کے چل

کہ پھوٹ نکلے دل نامراد کی کونپل

حسیں چمن میں بدل جائے ریگزار حیات

سراب یاس سے پیدا ہوں فرحتوں کے کنول

کئی برس سے ہے بے آب آبشار طلب

کبھی تو محو کرم ہو امید کے بادل

نہ روشنی نہ ترانے نہ رقص موج شمیم

ہنوز چشم سحر میں ہے رات کا کاجل

بہار میں بھی ہے پھولوں کو انتظار بہار

خدائے باغ یہ ترتیب باغ کچھ تو بدل

نہ چھپ سکے گا غم زندگی کا رخ اظہرؔ

نہ ڈال اس پہ فریب خیال کا آنچل