kuchh is liye mujhe luTne ka Dar ziyaada hai

kuchh is liye mujhe luTne kā Dar ziyāda hai

zarā sī hai mirī dīvār dar ziyāda hai

ye rāsta to mirā saath de nahīñ saktā

maiñ jāntā huuñ ki merā safar ziyāda hai

'ajab 'ilāj kiyā hai mire masīhā ne

mire maraz se davā kā asar ziyāda hai

maiñ boltā thā ki mujh ko nahīñ thā kuchh mā'lūm

maiñ chup huā huuñ ki mujh ko ḳhabar ziyāda hai

maiñ dekhne kī hadoñ se nikal ke dekhtā huuñ

mirī nigāh se merī nazar ziyāda hai

maiñ rakh sakā na tavāzun uḌaan meñ qaa.em

mire paroñ meñ kahīñ ek par ziyāda hai

ḳhudā kare ki hamesha mujhe gumān rahe

ki mere paas zarūrat se zar ziyāda hai

mire vatan kā yahī mas.ala rahā 'āsim'

yahāñ dimāġh hai kam aur sar ziyāda hai

kuchh is liye mujhe luTne ka Dar ziyaada hai

zara si hai meri diwar dar ziyaada hai

ye rasta to mera sath de nahin sakta

main jaanta hun ki mera safar ziyaada hai

'ajab 'ilaj kiya hai mere masiha ne

mere maraz se dawa ka asar ziyaada hai

main bolta tha ki mujh ko nahin tha kuchh ma'lum

main chup hua hun ki mujh ko KHabar ziyaada hai

main dekhne ki hadon se nikal ke dekhta hun

meri nigah se meri nazar ziyaada hai

main rakh saka na tawazun uDan mein qaem

mere paron mein kahin ek par ziyaada hai

KHuda kare ki hamesha mujhe guman rahe

ki mere pas zarurat se zar ziyaada hai

mere watan ka yahi masala raha 'asim'

yahan dimagh hai kam aur sar ziyaada hai