kuchh kam to hua ranj-e-farawan-e-tamanna

kuchh kam to huā ranj-e-farāvān-e-tamannā

āġhāz-e-junūñ go nahīñ pāyān-e-tamannā

phir yaas ne rakkhā hai qadam ḳhāna-e-dil meñ

yaanī hai ab allāh nigahbān-e-tamannā

go chaak huā dil magar armān na nikle

be-fā.eda kholā dar-e-zindān-e-tamannā

afsāna mirā ḳhvāb-e-zuleḳhā-e-mohabbat

jalva hai tirā yūsuf-e-kan.ān-e-tamannā

juz vāda-e-bātil nahīñ buniyād kuchh us kī

dil kaañp uThā dekh ke aivān-e-tamannā

ik jaan hai vo ḳhair se vārafta-e-ġham hai

ik dil hai so hai soḳhta-sāmān-e-tamannā

'fānī' kā dam ik din tire qadmoñ pe nikal jaa.e

dil kī ye tamannā hai ab ai jān-e-tamannā

kuchh kam to hua ranj-e-farawan-e-tamanna

aaghaz-e-junun go nahin payan-e-tamanna

phir yas ne rakkha hai qadam KHana-e-dil mein

yani hai ab allah nigahban-e-tamanna

go chaak hua dil magar arman na nikle

be-faeda khola dar-e-zindan-e-tamanna

afsana mera KHwab-e-zuleKHa-e-mohabbat

jalwa hai tera yusuf-e-kanan-e-tamanna

juz wada-e-baatil nahin buniyaad kuchh us ki

dil kanp uTha dekh ke aiwan-e-tamanna

ek jaan hai wo KHair se warafta-e-gham hai

ek dil hai so hai soKHta-saman-e-tamanna

'fani' ka dam ek din tere qadmon pe nikal jae

dil ki ye tamanna hai ab ai jaan-e-tamanna