کچھ کم تو ہوا رنج فراوان تمنا

کچھ کم تو ہوا رنج فراوان تمنا

آغاز جنوں گو نہیں پایان تمنا

پھر یاس نے رکھا ہے قدم خانۂ دل میں

یعنی ہے اب اللہ نگہبان تمنا

گو چاک ہوا دل مگر ارمان نہ نکلے

بے فائدہ کھولا در زندان تمنا

افسانہ مرا خواب زلیخائے محبت

جلوہ ہے ترا یوسف کنعان تمنا

جز وعدۂ باطل نہیں بنیاد کچھ اس کی

دل کانپ اٹھا دیکھ کے ایوان تمنا

اک جان ہے وہ خیر سے وارفتۂ غم ہے

اک دل ہے سو ہے سوختہ سامان تمنا

فانیؔ کا دم اک دن ترے قدموں پہ نکل جائے

دل کی یہ تمنا ہے اب اے جان تمنا