کچھ خیال دل حساس مری جاں رکھنا

کچھ خیال دل حساس مری جاں رکھنا

آئنہ ٹوٹ بھی سکتا ہے یہ امکاں رکھنا

ہو کے تحلیل وفا عکس کو پنہاں رکھنا

روبرو ذات کے آئینے کو حیراں رکھنا

گھر سے مانوس جو ہو جائے پرایا کیسا

جو بسے دل میں اسے قرب رگ جاں رکھنا

دکھ کے کانٹوں پہ سجا لینا تبسم کے گلاب

اپنی ہستی کو ہمہ رنگ گلستاں رکھنا

ہر نئے گام پہ تجدید وفا کر لینا

عزم نو سے سفر زیست کو آساں رکھنا

ظرف خالی ہو تو فریاد کناں ہوتا ہے

دل میں کچھ حسرت و امید کے ساماں رکھنا

تیرگی زیست کے آداب مٹا دیتی ہے

دل کو در آئے ہوئے درد سے تاباں رکھنا

وہم ہے وجہ پراگندۂ خاطر شارقؔ

وہم سے خود کو بہرحال گریزاں رکھنا