kuchh na kuchh mujhko bhi kar jaane ko ji chahta hai

kuchh na kuchh mujh ko bhī kar jaane ko jī chāhtā hai

aisī tanhā.ī ki mar jaane ko jī chāhtā hai

vo pareshān hai suntā huuñ bahut mere liye

aaj mujh ko bhī sañvar jaane ko jī chāhtā hai

taaki vo bhī mire jazbāt se vāqif ho jaa.e

us kī sāñsoñ meñ utar jaane ko jī chāhtā hai

us kī yādoñ kā tasalsul nahīñ ruktā ik pal

hasrat-o-yās meñ bhar jaane ko jī chāhtā hai

bād-e-sarsar ke tasallut meñ rahā huuñ itnā

ab bahāroñ se bhī Dar jaane ko jī chāhtā hai

kyoñ taqāzā-e-karam us se karūñ maiñ āḳhir

choT khā khā ke nikhar jaane ko jī chāhtā hai

koī ġham bāñTne vaalā bhī yahāñ jaise nahīñ

aise hālāt meñ ghar jaane ko jī chāhtā hai

ek do pal ke liye terī hasīñ palkoñ par

sūrat-e-ashk Thahar jaane ko jī chāhtā hai

muskurā kar baḌe andāz se ye us ne kahā

apne va.adoñ se mukar jaane ko jī chāhtā hai

log patthar se bhī hoñ saḳht jahāñ ai 'shād'

aisī bastī se guzar jaane ko jī chāhtā hai

kuchh na kuchh mujh ko bhi kar jaane ko ji chahta hai

aisi tanhai ki mar jaane ko ji chahta hai

wo pareshan hai sunta hun bahut mere liye

aaj mujh ko bhi sanwar jaane ko ji chahta hai

taki wo bhi mere jazbaat se waqif ho jae

us ki sanson mein utar jaane ko ji chahta hai

us ki yaadon ka tasalsul nahin rukta ek pal

hasrat-o-yas mein bhar jaane ko ji chahta hai

baad-e-sarsar ke tasallut mein raha hun itna

ab bahaaron se bhi Dar jaane ko ji chahta hai

kyon taqaza-e-karam us se karun main aaKHir

choT kha kha ke nikhar jaane ko ji chahta hai

koi gham banTne wala bhi yahan jaise nahin

aise haalat mein ghar jaane ko ji chahta hai

ek do pal ke liye teri hasin palkon par

surat-e-ashk Thahar jaane ko ji chahta hai

muskura kar baDe andaz se ye us ne kaha

apne wadon se mukar jaane ko ji chahta hai

log patthar se bhi hon saKHt jahan ai 'shad'

aisi basti se guzar jaane ko ji chahta hai