kuchh narm si kirnen bhi shamil hain bahaaron mein

kuchh narm sī kirneñ bhī shāmil haiñ bahāroñ meñ

paiġhām hai jiine kā mā'sūm ishāroñ meñ

nauḳhez ġhazāloñ meñ aur zohra-nigāroñ meñ

kāġhaz kā badan le kar baiThā huuñ sharāroñ meñ

phūloñ ko jo dekhā to mahsūs kiyā maiñ ne

shādāb vo hotā hai paltā hai jo ḳhāroñ meñ

har sang-e-malāmat ko jab chāhe masal Dāleñ

ab bhī vo ravānī hai tahzīb ke dhāroñ meñ

sāhil kā tamannā.ī is raaz ko kyā jaane

tūfān bhī hote haiñ ḳhāmosh kināroñ meñ

āzādī-e-gulshan kā haal us se koī pūchhe

ḳhud jis ne jalāyā hai ghar apnā bahāroñ meñ

vo log bhī ab ham se katrā ke guzarte haiñ

the jin ke liye 'shādāñ' ham jaan se pyāroñ meñ

kuchh narm si kirnen bhi shamil hain bahaaron mein

paigham hai jine ka ma'sum ishaaron mein

nauKHez ghazalon mein aur zohra-nigaron mein

kaghaz ka badan le kar baiTha hun shararon mein

phulon ko jo dekha to mahsus kiya main ne

shadab wo hota hai palta hai jo KHaron mein

har sang-e-malamat ko jab chahe masal Dalen

ab bhi wo rawani hai tahzib ke dhaaron mein

sahil ka tamannai is raaz ko kya jaane

tufan bhi hote hain KHamosh kinaron mein

aazadi-e-gulshan ka haal us se koi puchhe

KHud jis ne jalaya hai ghar apna bahaaron mein

wo log bhi ab hum se katra ke guzarte hain

the jin ke liye 'shadan' hum jaan se pyaron mein