کچھ روز آزماؤ گے اور لوٹ جاؤ گے

کچھ روز آزماؤ گے اور لوٹ جاؤ گے

تم بھی قریب آؤ گے اور لوٹ جاؤ گے

من مانیاں کرو گے تو پھر میرے ساتھ ساتھ

اپنا بھی دل دکھاؤ گے اور لوٹ جاؤ گے

تم بھی زمین دل پہ یقیناً مرے حبیب

زخموں کے گھر بناؤ گے اور لوٹ جاؤ گے

اس بات کا پتہ ہمیں پہلے نہ تھا کہ تم

نیچا ہمیں دکھاؤ گے اور لوٹ جاؤ گے

میں جانتا ہوں تم کو بھلی بھانتی غم گسار

اپنی ہی بس سناؤ گے اور لوٹ جاؤ گے

اتنے دنوں میں ہم نے یہ سوچا نہ ایک دن

تم بھی ہمیں ستاؤ گے اور لوٹ جاؤ گے

کمرے میں آج آیا تو دیوار نے کہا

پھر اس کے خط جلاؤ گے اور لوٹ جاؤ گے

وعدہ تو کر رہے ہو مگر جانتا ہوں تم

مطلب تلک نبھاؤ گے اور لوٹ جاؤ گے

سوہلؔ تمہاری زندگی دھوکوں سے ہے بھری

دو چار پھر سے کھاؤ گے اور لوٹ جاؤ گے