kuchh shauq-e-suKHan aur to kuchh kar-e-qalam aur

kuchh shauq-e-suḳhan aur to kuchh kār-e-qalam aur

kar le abhī kuchh der ye dildārī-e-ġham aur

dekheñge sahar ham ki na dekheñge sahar ham

shāyad ki na aa.egī koī shām-e-alam aur

ai rāh-rav-e-jāda-e-shab chal ki abhī to

raushan tujhe karne haiñ yahāñ naqsh-e-qadam aur

shorīda-sarī chhoḌ tū ye tesha-garī chhoḌ

sāmān-e-junūñ ab ke to karte haiñ baham aur

kuchh qatra-e-ḳhūñ-nāb nikālo tah-e-dil se

palkoñ pe sajāne haiñ abhī gauhar-e-ġham aur

ai rāhat-e-jāñ bhuul chalā hai tujhe ye dil

kar nazr-e-karam aur baḌhā jaur-o-sitam aur

kuchh shauq-e-suKHan aur to kuchh kar-e-qalam aur

kar le abhi kuchh der ye dildari-e-gham aur

dekhenge sahar hum ki na dekhenge sahar hum

shayad ki na aaegi koi sham-e-alam aur

ai rah-raw-e-jada-e-shab chal ki abhi to

raushan tujhe karne hain yahan naqsh-e-qadam aur

shorida-sari chhoD tu ye tesha-gari chhoD

saman-e-junun ab ke to karte hain baham aur

kuchh qatra-e-KHun-nab nikalo tah-e-dil se

palkon pe sajaane hain abhi gauhar-e-gham aur

ai rahat-e-jaan bhul chala hai tujhe ye dil

kar nazr-e-karam aur baDha jaur-o-sitam aur