کچھ شوق سخن اور تو کچھ کار قلم اور

کچھ شوق سخن اور تو کچھ کار قلم اور

کر لے ابھی کچھ دیر یہ دل داریٔ غم اور

دیکھیں گے سحر ہم کہ نہ دیکھیں گے سحر ہم

شاید کہ نہ آئے گی کوئی شام الم اور

اے راہ رو جادۂ شب چل کہ ابھی تو

روشن تجھے کرنے ہیں یہاں نقش قدم اور

شوریدہ سری چھوڑ تو یہ تیشہ گری چھوڑ

سامان جنوں اب کے تو کرتے ہیں بہم اور

کچھ قطرۂ خوں ناب نکالو تہ دل سے

پلکوں پہ سجانے ہیں ابھی گوہر غم اور

اے راحت جاں بھول چلا ہے تجھے یہ دل

کر نظر کرم اور بڑھا جور و ستم اور