kuchh to wo bhi ho mehrban kahin

kuchh to vo bhī ho mehrbān kahīñ

abr barse to ho makān kahīñ

dard dil kā kaheñ to kaise kaheñ

dil kī hotī hai kyā zabān kahīñ

ham 'ajab kashmakash meñ rahte haiñ

dil kahīñ de chuke bayān kahīñ

ik kalī ko yahāñ to jalnā hai

dhuup āḳhir to legī jaan kahīñ

vaqt kī bas yahī ḳharābī hai

is kī hotī nahīñ dukān kahīñ

gāhe-gāhe yahī ho kyoñ bolo

tum milo mujh se par ho dhyān kahīñ

chāñd sūraj bhī duur haiñ ham se

ham kahīñ haiñ to āsmān kahīñ

zindagī tū dhuāñ dhuāñ kyoñ hai

rafta rafta jale hai jaan kahīñ

aag hī aag hai jahāñ dekho

roz jaltā hai ab makān kahīñ

maut aa.ī to ziist hī na rahī

kis tarah phir bache nishān kahīñ

pyaar se sab jahāñ raheñ mil kar

aisā miltā nahīñ jahān kahīñ

kuchh to wo bhi ho mehrban kahin

abr barse to ho makan kahin

dard dil ka kahen to kaise kahen

dil ki hoti hai kya zaban kahin

hum 'ajab kashmakash mein rahte hain

dil kahin de chuke bayan kahin

ek kali ko yahan to jalna hai

dhup aaKHir to legi jaan kahin

waqt ki bas yahi KHarabi hai

is ki hoti nahin dukan kahin

gahe-gahe yahi ho kyon bolo

tum milo mujh se par ho dhyan kahin

chand suraj bhi dur hain hum se

hum kahin hain to aasman kahin

zindagi tu dhuan dhuan kyon hai

rafta rafta jale hai jaan kahin

aag hi aag hai jahan dekho

roz jalta hai ab makan kahin

maut aai to zist hi na rahi

kis tarah phir bache nishan kahin

pyar se sab jahan rahen mil kar

aisa milta nahin jahan kahin