کچھ تو وہ بھی ہو مہربان کہیں

کچھ تو وہ بھی ہو مہربان کہیں

ابر برسے تو ہو مکان کہیں

درد دل کا کہیں تو کیسے کہیں

دل کی ہوتی ہے کیا زبان کہیں

ہم عجب کشمکش میں رہتے ہیں

دل کہیں دے چکے بیان کہیں

اک کلی کو یہاں تو جلنا ہے

دھوپ آخر تو لے گی جان کہیں

وقت کی بس یہی خرابی ہے

اس کی ہوتی نہیں دکان کہیں

گاہے گاہے یہی ہو کیوں بولو

تم ملو مجھ سے پر ہو دھیان کہیں

چاند سورج بھی دور ہیں ہم سے

ہم کہیں ہیں تو آسمان کہیں

زندگی تو دھواں دھواں کیوں ہے

رفتہ رفتہ جلے ہے جان کہیں

آگ ہی آگ ہے جہاں دیکھو

روز جلتا ہے اب مکان کہیں

موت آئی تو زیست ہی نہ رہی

کس طرح پھر بچے نشان کہیں

پیار سے سب جہاں رہیں مل کر

ایسا ملتا نہیں جہان کہیں