kusum ke phul mere ghar mein wo laga hi gaya

kusum ke phuul mire ghar meñ vo lagā hī gayā

ye rang mere dupaTTe ko raas aa hī gayā

tamām 'umr jo zaḳhmoñ pe haath rakhtā rahā

zarā sī baat pe vo dil mirā dukhā hī gayā

vo itnī saarī nigāhoñ kī bhiiḌ se bach kar

maiñ jab udaas huī mere paas aa hī gayā

zarā sā sabr jo aaya thā vahshat-e-dil ko

vo jāte-jāte phir ik hashr sā uThā hī gayā

ab ek rishta-e-benām se use pūjūñ

ki por-por vo patthar mujhe banā hī gayā

maiñ gul-ba-dast thī aur saarā shahr sang-ba-dast

bhalā huā mirī bastī se vo chalā hī gayā

kusum ke phul mere ghar mein wo laga hi gaya

ye rang mere dupaTTe ko ras aa hi gaya

tamam 'umr jo zaKHmon pe hath rakhta raha

zara si baat pe wo dil mera dukha hi gaya

wo itni sari nigahon ki bhiD se bach kar

main jab udas hui mere pas aa hi gaya

zara sa sabr jo aaya tha wahshat-e-dil ko

wo jate-jate phir ek hashr sa uTha hi gaya

ab ek rishta-e-benam se use pujun

ki por-por wo patthar mujhe bana hi gaya

main gul-ba-dast thi aur sara shahr sang-ba-dast

bhala hua meri basti se wo chala hi gaya