کوزہ گر میں ترے کس خواب کا چہرہ ہو جاؤں

کوزہ گر میں ترے کس خواب کا چہرہ ہو جاؤں

صرف اک جسم کی مہلت ہے میں کیا کیا ہو جاؤں

تجھ میں اور مجھ میں بس اک فرق وفا ہی کا ہے

میں اگر ترک وفا کر دوں تو تجھ سا ہو جاؤں

مجھ کو میرے ہی اندھیرے نے چھپا رکھا ہے

جو تری ذات میں آ جاؤں ستارہ ہو جاؤں

سوچتے سب ہیں کہانی تو مکمل ہو جائے

چاہتا کوئی نہیں ہے کہ میں اس کا ہو جاؤں

چار دن قید میں رہ کر یہ تمنا بھی گئی

پہلے لگتا تھا کہ اے کاش پرندہ ہو جاؤں

میں تو بس ایک تصور ہوں وہی رہنے دے

ایسے بھی سوچ نہ مجھ کو کہ میں چہرہ ہو جاؤں

سب کی آنکھوں میں کھٹکتی ہے ہماری قربت

شہر کا شہر لگا ہے کہ اکیلا ہو جاؤں

عشق میں سارا کمال اصل میں فرقت کا ہے

جو بھی ہو جائے جدا مجھ سے میں اس کا ہو جاؤں