kya baat hai ai jaan-e-suKHan baat kiye ja

kyā baat hai ai jān-e-suḳhan baat kiye jā

māhaul pe naġhmāt kī barsāt kiye jā

duniyā kī nigāhoñ meñ baḌī hirs bharī hai

nā-ahl zamāne se hijābāt kiye jā

nekī kā irāda hai to phir pūchhnā kaisā

din raat faqīroñ kī mudārāt kiye jā

chalte raheñ mad.hosh piyāloñ kī ravish par

nādān sitāroñ ko hidāyāt kiye jā

allāh tirā husn kare aur ziyāda

ham rāh-nashīnoñ se mulāqāt kiye jā

ban aa.e javābāt to mil jā.eñge ḳhud hī

ai dāvar-e-mahshar tū savālāt kiye jā

hastī o adam kyā haiñ ba-juz jumbish-e-abrū

ai jān-e-kināyāt ishārāt kiye jā

kahtā hai 'adam' mujh ko har ik gosha-e-hastī

aayā hai to kuchh sair-e-ḳharābāt kiye jā

kya baat hai ai jaan-e-suKHan baat kiye ja

mahaul pe naghmat ki barsat kiye ja

duniya ki nigahon mein baDi hirs bhari hai

na-ahl zamane se hijabaat kiye ja

neki ka irada hai to phir puchhna kaisa

din raat faqiron ki mudaraat kiye ja

chalte rahen madhosh piyalon ki rawish par

nadan sitaron ko hidayat kiye ja

allah tera husn kare aur ziyaada

hum rah-nashinon se mulaqat kiye ja

ban aae jawabaat to mil jaenge KHud hi

ai dawar-e-mahshar tu sawalat kiye ja

hasti o adam kya hain ba-juz jumbish-e-abru

ai jaan-e-kinayat ishaaraat kiye ja

kahta hai 'adam' mujh ko har ek gosha-e-hasti

aaya hai to kuchh sair-e-KHarabaat kiye ja