kya batlaun kaise din main kaT raha hun

kyā batlā.ūñ kaise din maiñ kaaT rahā huuñ

motī huuñ aur raste meñ bekār paḌā huuñ

lambī lambī caroñ vāloñ se achchhā huuñ

rūkhī-sūkhī jo miltī hai khā letā huuñ

tanhā.ī meñ aksar maiñ sochā kartā huuñ

sūraj chāñd sitāre kyā haiñ aur maiñ kyā huuñ

bādal parbat dariyā chashme jangal sahrā

kyuuñ bhāte haiñ maiñ in sab kā kyā lagtā huuñ

aag aur paanī meñ kahte haiñ bair baḌā hai

lekin maiñ to us se mil kar ḳhush hotā huuñ

itnī nafrat yaaro mujh se kyuuñ karte ho

maiñ bhī gulshan kā ik gul huuñ tum jaisā huuñ

mere chāhne vāloñ kā bhī ik halqa hai

maiñ bhī gulzāroñ kī vaadī kā jharnā huuñ

mere chāl-chalan se bhī kuchh hāsil kar lo

maiñ bhī ik autār kā sā darja rakhtā huuñ

ek hī manzar ne āñkhoñ ko Dhāñp rakhā hai

roz-e-avval se ye sūraj dekh rahā huuñ

ḳhud se jab bāteñ karne ko jī chāhā hai

ghar se uTh kar nadī kināre jā baiThā huuñ

mere haal se duniyā kā andāza kar lo

maiñ phaldār shajar kā ik piilā pattā huuñ

dhyān ko tanhā.ī ke ghar kā peḌ samjhiye

maiñ bhī us ke saa.e meñ barsoñ baiThā huuñ

jaane kis pal kī ḳhushbū hai mere aage

jaane kis duniyā ke pīchhe dauḌ rahā huuñ

kaise kaise log guzarte haiñ nazroñ se

saarā din maiñ kaise kaise dukh sahtā huuñ

mere ḳhadd-o-ḳhāl ko dekho aur pahchāno

maiñ bhī apnī 'irfānī kā katba huuñ

bas ke pahiye ḳhaak uḌā jaate haiñ mujh par

vo kyā jāneñ kaun huuñ aur kis kā chehra huuñ

atā-patā kyā pūchh rahe ho merā logo

rāmpūrī shā'ir huuñ aur ġhazleñ kahtā huuñ

kya batlaun kaise din main kaT raha hun

moti hun aur raste mein bekar paDa hun

lambi lambi caron walon se achchha hun

rukhi-sukhi jo milti hai kha leta hun

tanhai mein aksar main socha karta hun

suraj chand sitare kya hain aur main kya hun

baadal parbat dariya chashme jangal sahra

kyun bhate hain main in sab ka kya lagta hun

aag aur pani mein kahte hain bair baDa hai

lekin main to us se mil kar KHush hota hun

itni nafrat yaro mujh se kyun karte ho

main bhi gulshan ka ek gul hun tum jaisa hun

mere chahne walon ka bhi ek halqa hai

main bhi gulzaron ki wadi ka jharna hun

mere chaal-chalan se bhi kuchh hasil kar lo

main bhi ek autar ka sa darja rakhta hun

ek hi manzar ne aankhon ko Dhanp rakha hai

roz-e-awwal se ye suraj dekh raha hun

KHud se jab baaten karne ko ji chaha hai

ghar se uTh kar nadi kinare ja baiTha hun

mere haal se duniya ka andaza kar lo

main phaldar shajar ka ek pila patta hun

dhyan ko tanhai ke ghar ka peD samjhiye

main bhi us ke sae mein barson baiTha hun

jaane kis pal ki KHushbu hai mere aage

jaane kis duniya ke pichhe dauD raha hun

kaise kaise log guzarte hain nazron se

sara din main kaise kaise dukh sahta hun

mere KHadd-o-KHal ko dekho aur pahchano

main bhi apni 'irfani ka katba hun

bas ke pahiye KHak uDa jate hain mujh par

wo kya jaanen kaun hun aur kis ka chehra hun

ata-pata kya puchh rahe ho mera logo

rampuri sha'ir hun aur ghazlen kahta hun