kya hai ilaj-e-gham ki jise aazmaun main

kyā hai 'ilāj-e-ġham ki jise āzmā.ūñ maiñ

logoñ ne hal batāyā use bhuul jā.ūñ maiñ

lekin hai dil kā hukm use bhūlnā nahīñ

yādoñ ke saath jiine kā fan siikh jā.ūñ maiñ

us kī kisī bhī baat se miltī hai kab ḳhushī

lahja hai itnā saḳht ki bas TuuT jā.ūñ maiñ

bezār itnā karne lagī hai ye zindagī

ai maut terā dar na kahīñ khaTkhaTā.ūñ maiñ

duhre naqāb chehre pe rakhtā hai ye jahāñ

kaise ab apnā hāl-e-dil us ko sunā.ūñ maiñ

tārīk shab ġhamoñ kī hai chāhat ke sāmne

behtar hai ab charāġh-e-tamannā bujhā.ūñ maiñ

kya hai 'ilaj-e-gham ki jise aazmaun main

logon ne hal bataya use bhul jaun main

lekin hai dil ka hukm use bhulna nahin

yaadon ke sath jine ka fan sikh jaun main

us ki kisi bhi baat se milti hai kab KHushi

lahja hai itna saKHt ki bas TuT jaun main

bezar itna karne lagi hai ye zindagi

ai maut tera dar na kahin khaTkhaTaun main

duhre naqab chehre pe rakhta hai ye jahan

kaise ab apna haal-e-dil us ko sunaun main

tarik shab ghamon ki hai chahat ke samne

behtar hai ab charagh-e-tamanna bujhaun main