kya hua gar jagne ki Than li aur so gae

kyā huā gar jāgne kī Thaan lī aur so ga.e

niiñd apnī thī use pahchān lī aur so ga.e

ghar kā darvāza khulā thā so khulā hī rah gayā

ham ne be-fikrī kī chādar taan lī aur so ga.e

kitnī achchhī ratjage kī raat aa.ī thī magar

ham ne tanhā.ī kī niyyat jaan lī aur so ga.e

ek do bose havā meñ bhej kar un kī taraf

un se ham ne halkī sī muskān lī aur so ga.e

raat jāgoge to din meñ Tuut jāoge 'ḳhalīl'

baat sachchī thī so ham ne maan lī aur so ga.e

kya hua gar jagne ki Than li aur so gae

nind apni thi use pahchan li aur so gae

ghar ka darwaza khula tha so khula hi rah gaya

hum ne be-fikri ki chadar tan li aur so gae

kitni achchhi ratjage ki raat aai thi magar

hum ne tanhai ki niyyat jaan li aur so gae

ek do bose hawa mein bhej kar un ki taraf

un se hum ne halki si muskan li aur so gae

raat jagoge to din mein Tut jaoge 'KHalil'

baat sachchi thi so hum ne man li aur so gae