kya jurm hai ye haal to jaane KHuda-e-maut

kyā jurm hai ye haal to jaane ḳhudā-e-maut

har nafs ke liye hai magar yaañ sazā-e-maut

kahtī hai 'aql maut ye hai bahr-e-zindagī

vo zindagī ki jo nahīñ hogī barā-.e-maut

duniyā kī zindagī to hai ik juzv-e-maut hī

is kā natīja ho nahīñ saktā sivā.e maut

sāñcha ye zindagī hai faqat ruuh ke liye

jab Dhal chuke to sāñche ko jaa.ez hai aa.e maut

kaisī Dhalī isī kā hai lāzim hameñ ḳhayāl

ne'mat banā.eñ maut ko kyoñ ho jafā-e-maut

hotā hai ġham zarūr magar kuchh hai maslahat

allāh kar de tab' ko rāz-āshnā-e-maut

kya jurm hai ye haal to jaane KHuda-e-maut

har nafs ke liye hai magar yan saza-e-maut

kahti hai 'aql maut ye hai bahr-e-zindagi

wo zindagi ki jo nahin hogi bara-e-maut

duniya ki zindagi to hai ek juzw-e-maut hi

is ka natija ho nahin sakta siwae maut

sancha ye zindagi hai faqat ruh ke liye

jab Dhal chuke to sanche ko jaez hai aae maut

kaisi Dhali isi ka hai lazim hamein KHayal

ne'mat banaen maut ko kyon ho jafa-e-maut

hota hai gham zarur magar kuchh hai maslahat

allah kar de tab' ko raaz-ashna-e-maut