کیا کہیں عالم شباب کی بات

کیا کہیں عالم شباب کی بات

معتبر ہوتی کب ہے خواب کی بات

جھڑ گئی شیخی ابر کی جس دم

چل پڑی دیدۂ پر آب کی بات

دیجے دم اس کو حضرت ناصح

جانتا جو نہ ہو جناب کی بات

ہے یہ اور آہ اس کا کوچہ ہے

کیا کہوں اس دل خراب کی بات

لاکھ پردہ کیا مگر نہ چھپی

آہ مجنون دل کباب کی بات

رنگ ہے زرد منہ پہ خشکی ہے

منہ سے نکلے ہے پیچ و تاب کی بات

آج کچھ بے قرار سے ہو تم

کہیں چھپتی ہے اضطراب کی بات

چل پڑی بزم مے کشاں میں جب

نگۂ چشم مست خواب کی بات

ہو گئے بس نشے ہرن سب کے

نہ رہی خاک کچھ شراب کی بات

سچ کہو کس سے دل لگا ہے عیشؔ

نہیں یاروں سے یہ حجاب کی بات