kya kahen kya shiar hai apna

kyā kaheñ kyā shi'ār hai apnā

'āshiqī rozgār hai apnā

muft meñ dil faroḳht karte haiñ

bas yahī kār-o-bār hai apnā

us se yuuñ dil kī baat kahte haiñ

jaise vo ġham-gusār hai apnā

un kī mahfil meñ chal dil-e-vahshī

kuchh abhī e'tibār hai apnā

ḳhud-numā.ī ne aa.ine se kahā

ḳhud bhī ab vo shikār hai apnā

kushta-e-intizār ham hī nahīñ

un ko bhī intizār hai apnā

dil meñ yādoñ ke diip raushan haiñ

kyā charāġhāñ dayār hai apnā

ham haiñ vo kārvān-e-tez-qadam

ki zamāna ġhubār hai apnā

kuchh na ho hāsil-e-junūñ 'parvāz'

dāman-e-tār-tār hai apnā

kya kahen kya shi'ar hai apna

'ashiqi rozgar hai apna

muft mein dil faroKHt karte hain

bas yahi kar-o-bar hai apna

us se yun dil ki baat kahte hain

jaise wo gham-gusar hai apna

un ki mahfil mein chal dil-e-wahshi

kuchh abhi e'tibar hai apna

KHud-numai ne aaine se kaha

KHud bhi ab wo shikar hai apna

kushta-e-intizar hum hi nahin

un ko bhi intizar hai apna

dil mein yaadon ke dip raushan hain

kya charaghan dayar hai apna

hum hain wo karwan-e-tez-qadam

ki zamana ghubar hai apna

kuchh na ho hasil-e-junun 'parwaz'

daman-e-tar-tar hai apna