کیا کہوں کیا حصول ہستی ہے

کیا کہوں کیا حصول ہستی ہے

روح قید بلا میں پھنستی ہے

زرد روئی سے زعفراں ہوں میں

خلق ہستی پہ میرے ہنستی ہے

نہیں جس دل میں داغ عشق بتاں

بخدا بے چراغ بستی ہے

جھکتے ہیں جو نجیب ہوتے ہیں

سچ ہے تیغ اصیل کستی ہے

یاد اس کاکل پریشاں کی

رات بھر بن کے سانپ ڈستی ہے

مست و مجذوب میں نہیں کچھ فرق

مے پرستی خدا پرستی ہے

ایک بوتل تو لے کے آ ساقی

جان مے خواروں کی ترستی ہے

ٹھنڈی ٹھنڈی ہوا ہے گلشن میں

دھیمی دھیمی گھٹا برستی ہے

دود دل سے ہے رو سیاہ فلک

آہ گردوں کا منہ جھلستی ہے

نیستی کا مزا نہیں ملتا

باقیؔ جب تک کہ اپنی ہستی ہے