kya karen ja ke gulsitan mein hum

kyā kareñ jā ke gulsitāñ meñ ham

haiñ ba-kunj-e-qafas fuġhāñ meñ ham

jānte aap se judā tujh ko

karte gar farq jism-o-jāñ meñ ham

haiñ tajallī-e-zāt ke terī

ek parda sā darmiyāñ meñ ham

gul kā ye rañg hai to ab ik din

aag rakh deñge āshiyāñ meñ ham

vaañ taġhāful ne apnā kaam kiyā

yaañ rahe mehr ke gumāñ meñ ham

āsmāñ ko nishāna karte haiñ

tiir rakhte haiñ jab kamāñ meñ ham

mar ke nikle qafas se ḳhuub huā

tañg aa.e the is makāñ meñ ham

gar yahī aah hai to dekhoge

raḳhne kar deñge āsmāñ meñ ham

shāḳh-e-gul ke gale se lag lag kar

rote haiñ mausam-e-ḳhizāñ meñ ham

baaġh tak jaate haañ agar paate

tāqat us jism-e-nā-tavāñ meñ ham

'mus.hafī' ishq kar ke āḳhir-kār

ḳhuub rusvā hue jahāñ meñ ham

kya karen ja ke gulsitan mein hum

hain ba-kunj-e-qafas fughan mein hum

jaante aap se juda tujh ko

karte gar farq jism-o-jaan mein hum

hain tajalli-e-zat ke teri

ek parda sa darmiyan mein hum

gul ka ye rang hai to ab ek din

aag rakh denge aashiyan mein hum

wan taghaful ne apna kaam kiya

yan rahe mehr ke guman mein hum

aasman ko nishana karte hain

tir rakhte hain jab kaman mein hum

mar ke nikle qafas se KHub hua

tang aae the is makan mein hum

gar yahi aah hai to dekhoge

raKHne kar denge aasman mein hum

shaKH-e-gul ke gale se lag lag kar

rote hain mausam-e-KHizan mein hum

bagh tak jate han agar pate

taqat us jism-e-na-tawan mein hum

'mushafi' ishq kar ke aaKHir-kar

KHub ruswa hue jahan mein hum