kya KHabar usko jo baiTha hai nishane wala

kyā ḳhabar us ko jo baiThā hai nishāne vaalā

mārne vaale se behtar hai bachāne vaalā

chand lamhoñ kī ḳhamoshī ko gavārā kar lo

varna ye vaqt bahut kuchh hai sunāne vaalā

dil kī gahrā.ī meñ utre to utar jaane do

mustaqil chehre pe nazroñ ko jamāne vaalā

mubtalā huuñ maiñ kisī kashmakash-e-zehnī meñ

yā'nī kuchh kahne na sunñe na sunāne vaalā

soch dīmak kī tarah chaaT rahī hai mujh ko

aur maiñ huuñ ki isī kaam meñ aane vaalā

kis tarah chain se baiThegā banā.egā makāñ

ghar kahīñ jaltā huā chhoḌ ke aane vaalā

dil kabhī Dūbtā mahsūs kiyā hai tum ne

tez dhāre kī tarah saath bahāne vaalā

tum to zaḳhmoñ pe namak ḳhuub chhiḌakte ho 'nishāt'

maiñ faqat ġhusse meñ hoñToñ ko chabāne vaalā

kya KHabar us ko jo baiTha hai nishane wala

marne wale se behtar hai bachane wala

chand lamhon ki KHamoshi ko gawara kar lo

warna ye waqt bahut kuchh hai sunane wala

dil ki gahrai mein utre to utar jaane do

mustaqil chehre pe nazron ko jamane wala

mubtala hun main kisi kashmakash-e-zehni mein

ya'ni kuchh kahne na sunne na sunane wala

soch dimak ki tarah chaT rahi hai mujh ko

aur main hun ki isi kaam mein aane wala

kis tarah chain se baiThega banaega makan

ghar kahin jalta hua chhoD ke aane wala

dil kabhi Dubta mahsus kiya hai tum ne

tez dhaare ki tarah sath bahane wala

tum to zaKHmon pe namak KHub chhiDakte ho 'nishat'

main faqat ghusse mein honTon ko chabane wala