kya KHata hui humse kuchh pata nahin milta

kyā ḳhatā huī ham se kuchh patā nahīñ miltā

ham duā to karte haiñ mudda.ā nahīñ miltā

us se lau lagāo to apnā sar jhukāo to

phir zarā batāo to tum ko kyā nahīñ miltā

chal paḌeñ to manzil ḳhud paas aane lagtī hai

jab qadam nahīñ uThte rāsta nahīñ miltā

ungliyāñ uThāte haiñ jo mirī vafāoñ par

kyā unheñ haqīqat kā aa.ina nahīñ miltā

yuuñ to haiñ hasīñ lākhoñ aaj bhī zamāne meñ

lekin aap ke jaisā dūsrā nahīñ miltā

kaun dekhtā hai ab ḳhud meñ husn-e-jānānāñ

apnā aks ab koī chūmtā nahīñ miltā

bhaa.ī ko judā kar deñ apne bhā.iyoñ se ye

dil ko joḌne vaalā rahnumā nahīñ miltā

un kī barhamī kā hai ḳhauf dil meñ ai fārūq

ab hasīñ gunāhoñ meñ bhī mazā nahīñ miltā

kya KHata hui hum se kuchh pata nahin milta

hum dua to karte hain muddaa nahin milta

us se lau lagao to apna sar jhukao to

phir zara batao to tum ko kya nahin milta

chal paDen to manzil KHud pas aane lagti hai

jab qadam nahin uThte rasta nahin milta

ungliyan uThate hain jo meri wafaon par

kya unhen haqiqat ka aaina nahin milta

yun to hain hasin lakhon aaj bhi zamane mein

lekin aap ke jaisa dusra nahin milta

kaun dekhta hai ab KHud mein husn-e-jaananan

apna aks ab koi chumta nahin milta

bhai ko juda kar den apne bhaiyon se ye

dil ko joDne wala rahnuma nahin milta

un ki barhami ka hai KHauf dil mein ai faruq

ab hasin gunahon mein bhi maza nahin milta